Zacarias 5

¹ א ואשוב ואשא עיני ואראה והנה מגלה עפה

² ב ויאמר אלי מה אתה ראה ואמר אני ראה מגלה עפה–ארכה עשרים באמה ורחבה עשר באמה

³ ג ויאמר אלי–זאת האלה היוצאת על פני כל הארץ כי כל הגנב מזה כמוה נקה וכל הנשבע מזה כמוה נקה

⁴ ד הוצאתיה נאם יהוה צבאות ובאה אל בית הגנב ואל בית הנשבע בשמי לשקר ולנה בתוך ביתו וכלתו ואת עציו ואת אבניו

⁵ ה ויצא המלאך הדבר בי ויאמר אלי–שא נא עיניך וראה מה היוצאת הזאת

⁶ ו ואמר מה היא ויאמר זאת האיפה היוצאת ויאמר זאת עינם בכל הארץ

⁷ ז והנה ככר עפרת נשאת וזאת אשה אחת יושבת בתוך האיפה

⁸ ח ויאמר זאת הרשעה וישלך אתה אל תוך האיפה וישלך את אבן העופרת אל פיה {ס}

⁹ ט ואשא עיני וארא והנה שתים נשים יוצאות ורוח בכנפיהם ולהנה כנפים ככנפי החסידה ותשאנה את האיפה בין הארץ ובין השמים

¹⁰ י ואמר אל המלאך הדבר בי אנה המה מולכות את האיפה

¹¹ יא ויאמר אלי לבנות לה בית בארץ שנער והוכן והניחה שם על מכנתה {ס}