1. א                  ויען איוב ויאמר

2. ב  מה-עזרת ללא-כח    הושעת זרוע לא-עז

3. ג  מה-יעצת ללא חכמה    ותשיה לרב הודעת

4. ד  את-מי הגדת מלין    ונשמת-מי יצאה ממך

5. ה  הרפאים יחוללו--    מתחת מים ושכניהם

6. ו  ערום שאול נגדו    ואין כסות לאבדון

7. ז  נטה צפון על-תהו    תלה ארץ על-בלימה

8. ח  צרר-מים בעביו    ולא-נבקע ענן תחתם

9. ט  מאחז פני-כסה    פרשז עליו עננו

10. י  חק-חג על-פני-מים--    עד-תכלית אור עם-חשך

11. יא  עמודי שמים ירופפו    ויתמהו מגערתו

12. יב  בכחו רגע הים    ובתובנתו (ובתבונתו) מחץ רהב

13. יג  ברוחו שמים שפרה    חללה ידו נחש ברח

14. יד  הן-אלה קצות דרכו--    ומה-שמץ דבר נשמע-בו ורעם גבורתו    מי יתבונן

Você está lendo na edição ALEPPO, Aleppo Codex, em Hebraico.
Este lívro compôe o Antigo Testamento, tem 42 capítulos, e 1050 versículos.