Lucas 23

¹ YA todo y linajyanñija mangajulo, ya macone asta as Pilatos.

² Ya matutujon mafaaela ilegñija: Inseda este na taotao na janaquequelache y nasionta, yan mañoñoma na umanae tributo si Sesat, ya ilelegña na güiya si Cristo un ray.

³ Ayonae si Pilatos finaesen ilegña: Jago y Ray y Judio sija? ya inepe ya ilegña: Jago umalog.

⁴ Ya si Pilatos ilegña ni y magas y mamale, yan y linajyan taotao sija: Taya isao jusoda güine na taotao.

⁵ Lao sija japotfia, ilegñija: Jaatbororota y taotao sija, mamananagüe guiya Judea todo, jatutujon desde Galilea asta esteja na lugat.

⁶ Ya anae jajungog este si Pilatos, mamaesen cao taotao Galilea.

⁷ Ya anae jatungo na gaegue gui sisiñan Herodes, janamanajanao asta as Herodes, sa estaba güe locue guiya Jerusalem güije sija na jaane.

⁸ Ya si Herodes anae jalie si Jesus, ninasenmagof: sa jagasja jadesea na ulie, sa jajujungog guinin güiya, megae na güinaja: ya jananangga na ufanlie guinin güiya y milagro.

⁹ Ya jafaesen megae na sinangan: lao taya inepe güe.

¹⁰ Yan mangaegue y magas y mamale yan y escribas na manmatatachong ya mafaaela güe fijom.

¹¹ Lao si Herodes yan y sendaluña, madespresia yan mabotlea, yan manaminagago ni lamlam na magago, ya manatalo guato as Pilatos.

¹² Ya umamigo si Pilatos yan Herodes güijeja na jaane: sa guinin umachatlie y dos.

¹³ Ya si Pilatos janaetnon y magas y mamale, yan y magalaje yan y taotao sija,

¹⁴ Ya ilegña nu sija: Inquene mague guiya guajo este na taotao na janaquequelache y taotao sija; ya, estagüe, na jufaesen gui menanmiyo, ya taya jusoda ni jafa na isao güine na taotao pot y finaaelamimiyo sija.

¹⁵ Aje, ni si Herodes: sa junafalag iya güiya, ya, estagüe, ni jafa na ufanmerese na finatae pot y guinin finatinasña.

¹⁶ Enao mina bae jucastiga ya jusotta.

¹⁷ Ya manesesita na umasotta uno gui guipot.

¹⁸ Ya managang cada uno, ilegñija: Nasuja juyong enao na taotao ya umasotta si Barabas:

¹⁹ Sa mapreso pot un jatsamiento yan mamuno ni y jafatinas gui siuda.

²⁰ Ya si Pilatos ilegña talo nu sija, Malagomiyo na umasotta si Jesus.

²¹ Lao managang ilegñija: Atane gui quiluus, atane gui quiluus.

²² Ya ilegña nu sija gui mina tres biaje: Sa jafa? jafa na taelaye finatinasña este na taotao? Taya ni jafa na causa para umapuno jusoda guiya güiya. Pot este na rason bae jucastigaja ya jusotta.

²³ Lao sija enseguidas janadangculo inagangñija, ya magagao na umaatane gui quiluus. Ya y inagangñija mangana.

²⁴ Ayonae si Pilatos janae sentensia na ufatinas taemano y guinagaoñiñija.

²⁵ Ya masotta ayo y guinin mapreso pot jatsamiento yan mamuno, ayo y guinin magagagao: ya manmaentrega as Jesus gui minalagoñija.

²⁶ Ya anae macocone güe maguot si Simon, taotao Sirene, ni guinin y fangualuan, ya manae ni quiluus na uapagaye gui taten Jesus.

²⁷ Ya matatitiye ni y dangculon linajyan taotao yan famalaoan sija ni mangacasao yan manatangis pot güiya.

²⁸ Lao si Jesus jabira güe tate guiya sija ilegña; Famalaoan Jerusalem, chamiyo fangacasao pot guajo, lao fangacasao pot jamyoja yan pot y famaguonmiyo.

²⁹ Sa, estagüe, na ufato sija jaane nae umaalog: Mandichoso sa y manmachora, yan y tiyan sija ni ti manmamañago, yan y pecho sija ni ti manmamómogsae.

³⁰ Ayonae matutujon maalog ni egso sija: Famodong gui jilonmame; ya y sabana sija: Tampe jam.

³¹ Sa yaguin y betde na jayo jafatinas estesija, y anglo, jafa uchogüe?

³² Ya macone locue dos palo na taelaye finatinasñija para ufanmapuno yan güiya.

³³ Ya anae manmato güije na lugat ni mafanaan Calabera, maatane gui quiluus güije yan ayo y dos ni y taelaye finatinasñija, uno gui agapa ya y otro gui acagüe.

³⁴ Ya si Jesus ilegña: Tata, asie estesija; sa ti jatungo jafa jachochogüe. Ya manafacae entre sija y magaguña, ya marifa.

³⁵ Ya y taotao sija manotojgue ya maaatanja. Ya mabotlelea ni y magas sija locue, ya ilelegñija: Ufañatba otrosija: palo ya usatban maesagüe, yaguin este si Cristo, ni guine as Yuus.

³⁶ Ya mamofefea ni y sendalo sija, manmato guiya güiya, ya mafanunue ni y binagle.

³⁷ Ya ilegñija: Yaguin jago Ray y Judio sija, satban maesa jao.

³⁸ Ya guaja locue un tinigue gui jiloña: ESTE GUIYA Y RAY Y JUDIO SIJA.

³⁹ Ya uno gui ayo y taelaye finatinasñija ilegna: Yaguin jago si Cristojao? Satban maesajao yan jame.

⁴⁰ Lao inepe ni otro, ya linalatde ilegña: Ti maañao jao as Yuus, sa gaegue jao gui mismo sinentensia?

⁴¹ Lao jita magajet na tunas; sa utafanresibe pot y finatinasta: lao este na taotao, taya taelaye finatinasña.

⁴² Ya ilegña: Jesus, jajaso yo yaguin matojao gui raenomo.

⁴³ Ayonae ilegña nu güiya: Magajet jusangane jao: Pago mismo na jaane utajita na dos guiya Paraiso.

⁴⁴ Ya anae buente y oran a las sais, jumuyong jomjom todo y jilo y tano asta y oran a las nuebe,

⁴⁵ Ya y atdao jomjom, ya y cottinan templo maipe gui talo.

⁴⁶ Ya anae umagang si Jesus, ni dangculo na inagang, ilegña: Tata, y canaemo nae jupolo y espiritujo; ya anae munjayan jasangan este, jaentrega y espiritu.

⁴⁷ Ya anae jalie y senturion estesija y manmalofan, janamalag si Yuus, ilegña: Sen magajet este na taotao na tunas.

⁴⁸ Ya todo y linajyan taotao ni mandaña anae manmalofan este sija, anae malie y jagas sinesede, natumalo guato ya jaseco pechonñija.

⁴⁹ Lao todo y atungoña yan y famalaoan ni tumatitiye güe desde Galilea, manestaba manlachago maatanja este sija.

⁵⁰ Ya estagüe, un taotao na y naanña si José, un taotao na pápagat, mauleg na taotao yan tunas:

⁵¹ (Ti jaconsiente y pinagatñija ni y finatinasñija:) Taotao Arimatea, gui Siuda y Judiosija, ya güiya locue jananangga y raenon Yuus.

⁵² Este mato gui as Pilatos, ya jagagao y tataotao Jesus.

⁵³ Ya janatunog gui quiluus, ya jabalutan gui un sabanas, ya japolo gui un naftan ni maguadog gui acho, ya taya ni uno mapolo güije antes.

⁵⁴ Ya ayo na jaane y inaregla y pascua, ya pago manana gui sabado.

⁵⁵ Ya manmato locue y famalaoan ni y tumatitiye desde Galilea, ya malie y naftan yan jaftaemano mapoloña y tataotaoña.

⁵⁶ Ya tumalo guato sija, ya manmamamauleg paopao yan inggüente sija: ya mandescansa gui sabado na jaane jaftaemanoja y tinago.