Provérbios 7

¹ Mia filo! konservu miajn vortojn, Kaj gardu ĉe vi miajn moralordonojn.

² Konservu miajn moralordonojn, kaj vivu; Kaj mian instruon, kiel la pupilon de viaj okuloj.

³ Ligu ilin al viaj fingroj; Skribu ilin sur la tabelo de via koro.

⁴ Diru al la saĝo:Vi estas mia fratino; Kaj la prudenton nomu mia parencino;

⁵ Por ke vi estu gardata kontraŭ fremda edzino, Kontraŭ fremdulino, kies paroloj estas glataj.

⁶ Ĉar mi rigardis tra fenestro de mia domo, Tra mia krado;

⁷ Kaj mi vidis inter la naivuloj, Mi rimarkis inter la nematuruloj junulon senprudentan,

⁸ Kiu pasis sur la placo preter ŝia angulo, Kaj iris la vojon al ŝia domo,

⁹ En krepusko, en vespero de tago, Kiam fariĝis nokto kaj mallumo.

¹⁰ Kaj jen renkonte al li iras virino En ornamo de publikulino, ruzema je la koro.

¹¹ Bruema kaj vagema; Ŝiaj piedoj ne loĝas en ŝia domo.

¹² Jen ŝi estas sur la strato, jen sur la placoj, Kaj apud ĉiu angulo ŝi embuskas.

¹³ Kaj ŝi kaptis lin, kaj kisis lin Kun senhonta vizaĝo, kaj diris al li:

¹⁴ Mi devis alporti dankan oferdonon; Hodiaŭ mi plenumis mian solenan promeson.

¹⁵ Tial mi eliris al vi renkonte, Por serĉi vian vizaĝon, kaj mi vin trovis.

¹⁶ Mi bele kovris mian liton Per multkoloraj teksaĵoj el Egiptujo.

¹⁷ Mi parfumis mian kuŝejon Per mirho, aloo, kaj cinamo.

¹⁸ Venu, ni ĝuu sufiĉe volupton ĝis la mateno, Ni plezuriĝu per la amo.

¹⁹ Ĉar mia edzo ne estas hejme, Li iris en malproksiman vojon;

²⁰ La sakon kun mono li prenis kun si; Li revenos hejmen je la plenluno.

²¹ Ŝi forlogis lin per sia multeparolado, Per sia glata buŝo ŝi lin entiris.

²² Li tuj iras post ŝi, Kiel bovo iras al la buĉo Kaj kiel katenita malsaĝulo al la puno;

²³ Ĝis sago fendas al li la hepaton; Kiel birdo rapidas al la kaptilo, Kaj ne scias, ke ĝi pereigas sian vivon.

²⁴ Kaj nun, infanoj, aŭskultu min, Atentu la vortojn de mia buŝo.

²⁵ Via koro ne flankiĝu al ŝia vojo, Ne eraru sur ŝia irejo;

²⁶ Ĉar multajn ŝi vundis kaj faligis, Kaj multegaj estas ŝiaj mortigitoj.

²⁷ Ŝia domo estas vojoj al Ŝeol, Kiuj kondukas malsupren al la ĉambroj de la morto.