Connect with us

Bíblia LUT-1545-LH

1 Reis 4

1 ALso war Salomo könig vber gantz Jsrael.

2 Vnd dis waren seine Fürsten / AsarJa / der son Zadok des Priesters.

3 Elihoreph vnd AhiJa die söne Sisa waren Schreiber. Josaphat der son Ahilud war Cantzler.

4 Benaia der son Joiada war Feldheubtman. Zadok vnd AbJathar waren Priester.

5 AsarJa der son Nathan war vber die Amptleute. Sabud der son Nathan des Priesters war des Königs freund.

6 Ahisar war Hoffmeister. Adoniram der son Abda war Rentmeister.

7 VND Salomo hatte zwelff Amptleute vber gantz Jsrael / die den König vnd sein Haus versorgeten / Einer hatte des jars ein mondlang zu versorgen.

8 Vnd hiessen also / Der son Hur auff dem gebirge Ephraim.

9 Der son Deker zu Makaz vnd zu Saalbim vnd zu BethSemes vnd zu Elon vnd BethHanan.

10 Der son Hesed zu Aruboth / vnd hatte dazu Socho vnd das gantze land Hepher.

11 Der son AbiNadab / die gantze Herrschafft zu Dor / vnd hatte Taphath Salomos tochter zum weibe.

12 Baena der son Ahilud zu Thaenach vnd zu Megiddo / vnd vber gantzes BethSean / welche ligt neben Zarthana / vnter Jesreel / von BethSean bis an den plan Mehola / bis jenseid Jakmeam.

13 Der son Geber zu Ramoth in Gilead / vnd hatte die Flecken Jair des sons Manasse in Gilead / vnd hatte die gegend Argob / die in Basan ligt / sechzig grosser Stedte vermauret vnd mit ehrnen Rigeln.

14 AHiNadab der son Jddo zu Mahanaim

15 Ahimaaz in Naphthali / Vnd der nam auch Salomos tochter Basmath zum weibe.

16 Baena der son Husai in Asser / vnd zu Aloth.

17 Josaphat der son Parnah in Jsaschar.

18 Simei der son Ela in BenJamin.

19 Geber der son Vri im lande Gilead / im lande Sihon des königes der Amoriter / vnd Og des königes in Basan / ein Amptman war in dem selbigen Lande.

20 Juda aber vnd Jsrael des war viel / wie der sand am meer / vnd assen vnd truncken vnd waren frölich.

Continuar Lendo

You must be logged in to post a comment Login

Leave a Reply