1 מַשָּׂא מוֹאָב כִּי בְּלֵיל שֻׁדַּד עָר מוֹאָב נִדְמָה כִּי בְּלֵיל שֻׁדַּד קִיר ־מוֹאָב נִדְמָֽה ׃
2 עָלָה הַבַּיִת וְדִיבֹן הַבָּמוֹת לְבֶכִי עַל ־נְבוֹ וְעַל מֵֽידְבָא מוֹאָב יְיֵלִיל בְּכָל ־רֹאשָׁיו קָרְחָה כָּל ־זָקָן גְּרוּעָֽה ׃
3 בְּחוּצֹתָיו חָגְרוּ שָׂק עַל גַּגּוֹתֶיהָ וּבִרְחֹבֹתֶיהָ כֻּלֹּה יְיֵלִיל יֹרֵד בַּבֶּֽכִי ׃
4 וַתִּזְעַק חֶשְׁבּוֹן וְאֶלְעָלֵה עַד ־יַהַץ נִשְׁמַע קוֹלָם עַל ־כֵּן חֲלֻצֵי מוֹאָב יָרִיעוּ נַפְשׁוֹ יָרְעָה לּֽוֹ ׃
5 לִבִּי לְמוֹאָב יִזְעָק בְּרִיחֶהָ עַד ־צֹעַר עֶגְלַת שְׁלִשִׁיָּה כִּי ׀מַעֲלֵה הַלּוּחִית בִּבְכִי יַֽעֲלֶה ־בּוֹ כִּי דֶּרֶךְ חוֹרֹנַיִם זַעֲקַת ־שֶׁבֶר יְעֹעֵֽרוּ ׃
6 כִּֽי ־מֵי נִמְרִים מְשַׁמּוֹת יִֽהְיוּ כִּֽי ־יָבֵשׁ חָצִיר כָּלָה דֶשֶׁא יֶרֶק לֹא הָיָֽה ׃
7 עַל ־כֵּן יִתְרָה עָשָׂה וּפְקֻדָּתָם עַל נַחַל הָעֲרָבִים יִשָּׂאֽוּם ׃
8 כִּֽי ־הִקִּיפָה הַזְּעָקָה אֶת ־גְּבוּל מוֹאָב עַד ־אֶגְלַיִם יִלְלָתָהּ וּבְאֵר אֵילִים יִלְלָתָֽהּ ׃
9 כִּי מֵי דִימוֹן מָלְאוּ דָם כִּֽי ־אָשִׁית עַל ־דִּימוֹן נוֹסָפוֹת לִפְלֵיטַת מוֹאָב אַרְיֵה וְלִשְׁאֵרִית אֲדָמָֽה ׃