Salmos 122

¹ שִׁיר הַֽמַּעֲלוֹת לְדָוִד שָׂמַחְתִּי בְּאֹמְרִים לִי בֵּית יְהוָה נֵלֵֽךְ ׃

² עֹמְדוֹת הָיוּ רַגְלֵינוּ בִּשְׁעָרַיִךְ יְרוּשָׁלִָֽם ׃

³ יְרוּשָׁלִַם הַבְּנוּיָה כְּעִיר שֶׁחֻבְּרָה ־לָּהּ יַחְדָּֽו ׃

⁴ שֶׁשָּׁם עָלוּ שְׁבָטִים שִׁבְטֵי ־יָהּ עֵדוּת לְיִשְׂרָאֵל לְהֹדוֹת לְשֵׁם יְהוָֽה ׃

⁵ כִּי שָׁמָּה ׀יָשְׁבוּ כִסְאוֹת לְמִשְׁפָּט כִּסְאוֹת לְבֵית דָּוִֽיד ׃

⁶ שַׁאֲלוּ שְׁלוֹם יְרוּשָׁלִָם יִשְׁלָיוּ אֹהֲבָֽיִךְ ׃

⁷ יְהִֽי ־שָׁלוֹם בְּחֵילֵךְ שַׁלְוָה בְּאַרְמְנוֹתָֽיִךְ ׃

⁸ לְמַעַן אַחַי וְרֵעָי אֲדַבְּרָה ־נָּא שָׁלוֹם בָּֽךְ ׃

⁹ לְמַעַן בֵּית ־יְהוָה אֱלֹהֵינוּ אֲבַקְשָׁה טוֹב לָֽךְ ׃