1 עַל נַהֲרוֹת ׀בָּבֶל שָׁם יָשַׁבְנוּ גַּם ־בָּכִינוּ בְּזָכְרֵנוּ אֶת ־צִיּֽוֹן ׃
2 עַֽל ־עֲרָבִים בְּתוֹכָהּ תָּלִינוּ כִּנֹּרוֹתֵֽינוּ ׃
3 כִּי שָׁם שְֽׁאֵלוּנוּ שׁוֹבֵינוּ דִּבְרֵי ־שִׁיר וְתוֹלָלֵינוּ שִׂמְחָה שִׁירוּ לָנוּ מִשִּׁיר צִיּֽוֹן ׃
4 אֵיךְ נָשִׁיר אֶת ־שִׁיר ־יְהוָה עַל אַדְמַת נֵכָֽר ׃
5 אִֽם ־אֶשְׁכָּחֵךְ יְֽרוּשָׁלִָם תִּשְׁכַּח יְמִינִֽי ׃
6 תִּדְבַּק ־לְשׁוֹנִי ׀לְחִכִּי אִם ־לֹא אֶזְכְּרֵכִי אִם ־לֹא אַעֲלֶה אֶת ־יְרוּשָׁלִַם עַל רֹאשׁ שִׂמְחָתִֽי ׃
7 זְכֹר יְהוָה ׀לִבְנֵי אֱדוֹם אֵת יוֹם יְֽרוּשָׁלִָם הָאֹמְרִים עָרוּ ׀עָרוּ עַד הַיְסוֹד בָּֽהּ ׃
8 בַּת ־בָּבֶל הַשְּׁדוּדָה אַשְׁרֵי שֶׁיְשַׁלֶּם ־לָךְ אֶת ־גְּמוּלֵךְ שֶׁגָּמַלְתְּ לָֽנוּ ׃
9 אַשְׁרֵי ׀שֶׁיֹּאחֵז וְנִפֵּץ אֶֽת ־עֹלָלַיִךְ אֶל ־הַסָּֽלַע ׃