1 לַמְנַצֵּחַ ׀עַל ־יוֹנַת אֵלֶם רְחֹקִים לְדָוִד מִכְתָּם בֶּֽאֱחֹז אֹתוֹ פְלִשְׁתִּים בְּגַֽת ׃
2 חָנֵּנִי אֱלֹהִים כִּֽי ־שְׁאָפַנִי אֱנוֹשׁ כָּל ־הַיּוֹם לֹחֵם יִלְחָצֵֽנִי ׃
3 שָׁאֲפוּ שׁוֹרְרַי כָּל ־הַיּוֹם כִּֽי ־רַבִּים לֹחֲמִים לִי מָרֽוֹם ׃
4 יוֹם אִירָא אֲנִי אֵלֶיךָ אֶבְטָֽח ׃
5 בֵּאלֹהִים אֲהַלֵּל דְּבָרוֹ בֵּאלֹהִים בָּטַחְתִּי לֹא אִירָא מַה ־יַּעֲשֶׂה בָשָׂר לִֽי ׃
6 כָּל ־הַיּוֹם דְּבָרַי יְעַצֵּבוּ עָלַי כָּל ־מַחְשְׁבֹתָם לָרָֽע ׃
7 יָגוּרוּ ׀יצפינו הֵמָּה עֲקֵבַי יִשְׁמֹרוּ כַּאֲשֶׁר קִוּוּ נַפְשִֽׁי ׃
8 עַל ־אָוֶן פַּלֶּט ־לָמוֹ בְּאַף עַמִּים ׀הוֹרֵד אֱלֹהִֽים ׃
9 נֹדִי סָפַרְתָּה אָתָּה שִׂימָה דִמְעָתִי בְנֹאדֶךָ הֲלֹא בְּסִפְרָתֶֽךָ ׃
10 אָז יָשׁוּבוּ אוֹיְבַי אָחוֹר בְּיוֹם אֶקְרָא זֶה ־יָדַעְתִּי כִּֽי ־אֱלֹהִים לִֽי ׃
11 בֵּֽאלֹהִים אֲהַלֵּל דָּבָר בַּיהוָה אֲהַלֵּל דָּבָֽר ׃
12 בֵּֽאלֹהִים בָּטַחְתִּי לֹא אִירָא מַה ־יַּעֲשֶׂה אָדָם לִֽי ׃
13 עָלַי אֱלֹהִים נְדָרֶיךָ אֲשַׁלֵּם תּוֹדֹת לָֽךְ ׃כִּי הִצַּלְתָּ נַפְשִׁי מִמָּוֶת הֲלֹא רַגְלַי מִדֶּחִי לְהִֽתְהַלֵּךְ לִפְנֵי אֱלֹהִים בְּאוֹר הַֽחַיִּֽים ׃